اسلام آباد۔16مارچ (اے پی پی):وزیر اعظم محمد شہباز شریف کوں سعودی ولی عہد اتے وزیر اعظم شہزادہ محمد بن سلمان بن عبدالعزیز السعود ہفتے کوں ٹیلی فون تے مبارخ ݙتی ۔ وزیر اعظم آفس میڈیا ونگ توں جاری اعلامیہ موجب سعودی ولی عہد وزیر اعظم کوں ول منتخب تھیوݨ تے مبارخ ݙتی ۔ وزیر اعظم محمد شہباز شریف ٹیلی فون کال دے نال نال وزیر اعظم دا عہدہ سنبھالݨ دے وختی بعد بھیجے ڳئے مبارخ دے پرجوش پیغام تے انہاں دا شکریہ ادا کیتے ۔وزیراعظم الحرمین الشریفین دے متولی شاہ سلمان بن عبدالعزیز دی صحت و تندرستی سانڳے نیک تمناواں اتے دعاواں دا اظہاروی کیتے۔ انہاں آکھیے جو پاکستان دے عوام سعودی عرب دے فرمانروا اتے ولی عہد سانڳے بے پناہ محبت اتے احترام رکھیندن ۔انہاں سعودی قیادت نال سعودی عوام کوں وی رمضان المبارک دے بابرکت مہینے دی مبارخ ݙتی تے دعا کیتی جو اے مقدس مہینہ پوری دنیا دے مسلماناں سانڳے امن تے خوشحالی گھن آوے ۔ وزیراعظم آکھیے پاکستان کوں سعودی عرب نال آپݨے تاریخی، گہرے اتے بھرپی آلے تعلقات تے فخر اے اتے ݙوہییں ملک ہمیشہ ھک ݙوجھے دا ساتھ ݙتے ۔ انہاں پاکستان دے ساتھ غیر متزلزل عزم اتے حمایت تے سعودی عرب دی تعریف کیتی۔ وزیراعظم محمد شہباز شریف ولی عہد کوں وختی پاکستان دا سرکاری دورہ کرݨ دی دعوت ݙتی تے آکھیے جو پاکستانی عوام شاہی عظمت دے پرتپاک استقبال دے منتظر ہن ۔ سعودی ولی عہد وزیر اعظم دے جذبات تے شکریہ ادا کیتے۔ شہزادہ محمد بن سلمان آکھیے ݙوہیں ملکاں نیڑے بھرپی آلے تعلقات ہن تے پاکستان سانڳے سعودی عرب دی حمایت دا اعادہ کیتے۔
