اسلام آباد۔20فروری(اے پی پی)صدر مملکت ڈاکٹر عارف علوی پنجاب اتے خیبر پختونخواہ اچ 9 اپریل آݙت کوں صوبائی اسمبلیاں دے انتخابات دا اعلان کر ݙتے۔ صدر مملکت اے اعلان الیکشن ایکٹ 2017 دے سیکشن (1)57 دے تحت کیتے اتے چیف الیکشن کمشنر کوں آکھیے جو او الیکشن کمیشن ایکٹ دے سیکشن (2)57 دے تحت الیکشن دا پروگرام جاری کیتا ونڄے۔ صدر مملکت آکھیے جو انہاں آئین دے تحت آئین دے تحفظ اتے دفاع دا حلف چاتے، کیوں جو کہیں وی عدالتی فورم ولوں کوئی حکم امتناع کائنی، تہوں سیکشن (1)57 دے تحت صدر دے اختیار دے استعمال اچ کوئی رکاوٹ کائنی اتے آئین و قانون 90 ݙینھ توں ودھ دی دیر کیتے اجازت نئیں ݙیندا، تاریخ دا اعلان کرݨ آئین دی خلاف ورزی توں بچݨ کیتے اپݨ آئینی و قانونی فرض سانڳے کرینداں۔ صدر آکھیے جو الیکشن دی تاریخ ݙیوݨ کیتے پنجاب اتے خیبرپختونخواہ دے گورنرز اپݨی آئینی ذمہ داریاں نئیں ںبھیندے پئے ڄݙاں جو الیکشن کمیشن آف پاکستان وی اپݨی ذمہ داری تے ڄے مڄے وات اے، ایں سانڳے دیر تھیوݨ اتے آئینی شقاں دی خلاف ورزی دا وݙا خطرہ اے۔ صدر مملکت آکھیے جو اسمبلیاں دے عام انتخابات دی تاریخ کیتے الیکشن کمیشن نال صلاح دا سنجیدہ عمل شروع کیتے ٻھل الیکشن کمیشن ایں بارے اجلاس اچ آوݨ توں انکار کیتے جیندے بعد صدر مملکت ہوندے سیکشن (1)57 دے تحت اختیارات استعمال کریندے صوبائی اسمبلیاں دے عام انتخابات کیتے 9 اپریل 2023 آݙت دی تاریخ دا اعلان کرینداں۔
