اسلام آباد۔10مئی(اے پی پی) سپیکر قومی اسمبلی راجہ پرویز اشرف آکھیے پارلیمان طاقت دا مرکز اتے آئین دا مصنف اے، اے واحد قانون ساز ادارہ اے،عوام دی مرضی پارلیمان توں جنم گھندی اے تے سارے اداریں کوں عوام دے ایں خود مختار اتے اعلیٰ ادارے دے سامݨے جوابدہ ہووݨا چاہیدے ، ایہو ساݙے آئین دی روح اے اتے اے ھک ہمہ گیر، سانجھے احترام، متنوع اتے مکالمے تے مبنی پاکستان دا واحد رستہ اے۔ قومی اسمبلی اچ آئین پاکستان دی گولڈن جوبلی دی مناسبت نال منعقدہ ݙو ݙینھ وار عالمی کنونشن دے افتتاحی سیشن توں خطاب کریندے ہوئیں سپیکر مندوبین تے مہماناں کوں خوش آمدید آکھیے ۔تقریب اچ 17 توں ودھ ملکاں دے مندوبین شریک تھئے ۔غیر ملکی شرکاء اچ مختلف ملکاں دے سپیکرز ،ڈپٹی سپیکرز،بین الاقوامی قانونی ماہرین اتے مختلف شعبہ ہائےزندگی دے نمائندے شریک ہن۔سپیکر آکھیے میکوں ٻہوں خوشی اے جو تساں سارے اسلامی جمہوریہ پاکستان دے آئین دی گولڈن جوبلی دی تقریب اچ شریک ہیوے ۔سپیکر قومی اسمبلی آکھیے تساں ساریں دی اتھاں موجودگی ایں ڳالھ دی عکاس اے جو تساں آئین و قانون دی پاسداری، جمہوریت، قانون دی حکمرانی اتے عوام دےمنتخب نمائندیں دے ذریعے اختیارات دی منتقلی تے یقین رکھیندن ۔ سپیکر قومی اسمبلی وزیر اعظم پاکستان دا خصوصی شکریہ ادا کریندے ہوئیں آکھیے میں آپݨے وزیر اعظم شہباز شریف دا خصوصی طور تے مشکور ہاں جو انہاں دی مسلسل حمایت اتے آئین دے 50 سال دی ھک مہینے تئیں جاری رہݨ آلی تقریبات اچ ذاتی دلچسپی ڳھدی اے وزیراعظم دی پارلیمنٹ دی بالادستی تے انہاں دے غیرمتزلزل یقین دا اظہار کریندے تے پورا ایوان انہاں دی انتھک کوششاں دی تعریف اچ میݙے نال متفق اے۔سپیکر آکھیے میں آپݨی پارٹی، پاکستان پیپلز پارٹی دی قیادت، یعنی صدر آصف علی زرداری اتے وزیر خارجہ و چیئرمین بلاول بھٹو زرداری دا یکساں طور تے مشکور ہاں، جنہاں آئین دے تحفظ، تے دفاع کیتے آپݨے غیر متزلزل عزم دا اظہار کیتے،ایں سمت اچ آپ دا ہر قدم 1973 دے آئین دے بانی شہید ذوالفقارعلی بھٹو تے شہید محترمہ بے نظیر بھٹو دی ایں مقدس دستاویز کوں برقرار رکھݨ اچ ݙتی ڳئی قربانیاں دی بازگشت اے۔
