اسلام آباد۔1اگست(اے پی پی) متحدہ قومی موومنٹ دے رہنما مصطفیٰ کمال آکھیے متحدہ قومی موومنٹ ھک ذمہ وار جماعت اے جیں کݙاہیں ملکی مسئلیں تے سیاست برائے سیاست دا طریقہ اختیار نی کیتا ، آئی پی پیز دے مسئلے سودھے ملک دے سارے مسئلیں کوں کھلیاں اکھیں نال ݙیکھݨ دی لوڑھ اے ، اطمینان دی ڳالھ اے ہے جو وزیراعظم محمد شہباز شریف اتے انہاں دی ٹیم آئی پی پیز، بجلی بحران اتے ملکی معیشت کوں پیش آندے مسئلیں دے حل سانڳے سنجیدہ کوششاں کریندے پئن جیں توں عوام کوں ریلیف ملسی ۔ اے ڳالھ انہاں وفاقی وزیر اطلاعات و نشریات عطاء اﷲ تارڑ دے رلے پریس کانفرنس توں خطاب اچ آکھی اے ۔ متحدہ قومی موومنٹ دے رہنما مصطفیٰ کمال آکھیے ایم کیو ایم آئی پی پیز یا بجلی بحران دے مسئلے تے کہیں وی سیاسی جماعت یا کہیں سابق حکومت کوں الزام تراشی دا نشانہ نی بݨایا ،جے صرف مسئلیں تے پوائنٹ سکورنگ کرتے اپݨی جان چھڑاوݨی اے تاں ایں نال نمبر تاں بݨ ویسن لیکن لوکاں دے مسئلے حل نہ تھیسن ، ماضی اچ ملک دے مفاد اچ ہی آئی پی پیز لڳے ہوسن لیکن اڄ ملک دی معاشی صورتحال اچ اے ڳالھ ثابت تھیندی پئی اے جو اے سٹرکچر مزید نی چل سڳدا ایں تے ݙوجھی نظر پاوݨ دی لوڑھ اے۔ انہاں آکھیے اساں کئی واری ایندا حل پیش کیتے ٻاہر دیاں کمپنیاں کوں انڄ کرتے مقامی کمپنیاں نال ڳالھ مہاڑ کیتی ونڄ سڳدی اے ۔ آئی پی پیز دے مسئلے کوں حل کرݨ دی لوڑھ اے
